齋月革命

齋月革命，乜安到二月初八革命、二 ・ 八政變抑係一九六三年二月伊拉克政變，係由復興黨伊拉克派別在一九六三年推翻伊拉克總理卡塞姆个軍事政變。佢發生在一九六三年二月初八到初十之間。卡塞姆个前副手阿卜杜塞拉姆 ・ 阿里夫毋係一儕復興黨人，佢分總統這一主要儀式銜頭，而傑出个復興黨將軍艾哈邁德 ・ 哈桑 ・ 貝克爾分人任命為總理。新政府最有權勢个領導人係伊拉克復興黨秘書長阿里 ・ 薩利赫 ・ 薩迪（Ali Salih al-Sa'di）， 佢控制了國民警衛隊民兵，在政變後組織了幾下百儕人（ 抑係幾下千儕人）个大屠殺。

政變過程

卡塞姆在一九六三年二月八號，齋月个第十四日分人撤職。故所，這場政變分人安到齋月十四政變。對一九六二年以來，這場政變一直都係在策劃階段，還過計畫幾下擺嘗試，毋過因爭愁會發現會分人放棄。這場政變最一開始計畫在一月十八舉辦，毋過在卡塞姆得知這計畫還過捉著一兜策劃者過後，政變分人慢到一月二十五號， 過吔係二月初八。

這場政變始在一九六三年二月初八打早，該央時共產主義空軍司令賈拉爾 ・ 阿夫卡蒂分人暗殺，坦克部隊占領了阿布格萊布電台。隨等復興主義陰謀家摎親卡塞姆部隊之間个激烈戰鬥，一場為期兩日个鬥爭展開吔。卡塞姆在國防部避難，該片个戰鬥變啊特別激烈。共產黨个同情者行上街頭抵制政變，增加了高傷亡。

二月初九，卡塞姆最尾投降，以換取安全撤離這個國家。毋過佢个要求又分人拒絕了，初九下晝頭，卡塞姆照新成立个全國革命指揮委員會（NCRC）个命令分人處決。卡塞姆在巴格達電臺接受了模擬審判，然後分人㓾忒。佢死無幾久，政變領導人在電視頂高展示了佢个身屍。

相關个條目

• 一九五八年伊拉克革命
• 七月十七革命