一九二四年義大利大選
一九二四年義大利大選係一九二四年四月初六在義大利王國舉行个大選，這係一直到一九四六年義大利个最後一擺自由選舉。係次選舉个根據《阿塞博法》來做著舉行，法規定愛打票最多个政黨只需要取得選舉當中超過百分之二十五个選票，就做得得著國會三分之二个議席。當時選舉聯盟國家名單个領袖墨索里尼使用恐嚇摎威迫个戰術，得著壓倒性个勝利跈等得著國會三分之二多數个議席。五月二十四號，第二十七屆國會會期正式開始。
背景
一九二二年十月，國家法西斯黨个後生領袖貝尼托 ・ 墨索里尼發動了「進軍羅馬」，其中將近三萬儕个法西斯主義者參係摎這場政變。十月二十四，墨索里尼在該不勒斯个六萬人前進行演講：「 𫣆綱領當簡單啊，𫣆愛統治義大利。」法西斯烏衫軍該央時已經佔領吔義大利个一兜戰略愛地，開始向首都羅馬進軍。 十月二十六，前總理安東尼奧 ・ 薩蘭德拉警告現任總理路易吉 ・ 法克塔，墨索里尼要求佢辭頭路並準備在羅馬示威。毋過法克塔並無相信，認為墨索里尼會在佢脣項恬恬管理政府事務。盡尾，法克塔為著應對在羅馬个法西斯軍隊帶來个威脅下令對羅馬進行軍事包圍，正開始法克塔恅著義大利國王維克托 ・ 伊曼紐爾三世會同意這隻行動，毋過國王毋單淨拒絕簽署軍事命令，而且在二十八將權力交分取得軍方、商界摎右翼支持个墨索里尼。雖然這場遊行本身由不足三萬儕組成，毋過國王在面對法西斯个恐嚇下，因為愁爆發內戰使墨索里尼在行動當中得著權力了。雖然政變無法度直接授分法西斯黨个政權， 毋過佢還係使致著墨索里尼摎維克托 ・ 伊曼紐爾三世之間个平等協議，使墨索里尼在三十一號就任成為義大利總理。
參選政黨摎領袖
選舉舞弊
投票日當日，法西斯主義支持者控制吔所有个投票站，佢兜用暴力阻擋其他黨派監票員个監票工作。一般選民需要三儕人一組集體投票，若講發現有人拒絕投入國家名單，第二日會有制裁，包含剝奪工作或者進行人身迫害，用恐嚇个方式強制選民來投票分國家名單个候選人。
結果
選後暗殺个事件
選舉結束過後新一屆國會正式開始運作，一九二四年五月三十，國會第三大黨議員吉亞科莫 ・ 馬泰奧蒂在議會頂高發言指控法西斯黨還過墨索里尼在選舉當中舞弊，又批評佢兜使用暴力摎威嚇手段取得選票。早前佢也識出版過一本抨擊法西斯黨个書《法西斯黨真相》（_ The Fascisti Exposed : A Year of Fascist Domination _）。 六月初十，馬泰奧蒂分人綁架還有殺害，身屍在共年八月十六號分人發現。